ورال قالاسىنداعى كۇردەلى جوندەۋدەن وتكەن جاستار ستاديونى ەلوردانىڭ 20 جىلدىق مەرەكەسى قارساڭىندا سالتاناتتى تۇردە اشىلىپ، تۇرعىنداردىڭ يگىلىگىنە بەرىلدى.
حالىقارالىق ستاندارتقا ساي سالىنعان ستاديوننىڭ اۋماعى 7900 شارشى مەتردى قۇرايدى. الاڭعا جاساندى گازون توسەلىپ، جاستار مەن جاسوسپىرىمدەردىڭ فۋتبول ويناۋىنا جاعداي جاسالعان. ال قىس مەزگىلىندە مۇندا مۇز توسەلىپ، كوپشىلىك سىرعاناۋ مەن دوپتى حوككەي ويناۋعا مۇمكىندىك بەرىلەدى. اشىق مۇز ايدىنىندا حوككەيشىلەر +10 گرادۋستا دا ەمىن-ەركىن جاتتىعا الادى.
- ەلباسى حالىققا ارناعان ءار جولداۋىندا بۇقارالىق سپورتپەن تۇراقتى اينالىسۋ ۇلت دەنساۋلىعىنىڭ اجىراماس بولىگى ەكەنىن ايتىپ كەلەدى. سپورتتىڭ ينفراقۇرىلىمىن دامىتۋ ماقساتىندا وڭىرىمىزدە ءبىرقاتار جۇمىستار اتقارىلدى. ايتا كەتسەك، سوڭعى ەكى جىلدىڭ ىشىندە ورال قالاسىندا 50 اۋلا اباتتاندىرىلىپ، 20 سپورت الاڭى سالىندى. بىلتىر اقساي قالاسىندا سپورت كەشەنى سالىنىپ، تۇرعىنداردىڭ يگىلىگىنە بەرىلدى. سونداي-اق وسىدان ءۇش جىل بۇرىن بۇل ستاديونعا كۇردەلى جوندەۋ جۇرگىزۋ تۋرالى ماسەلە كوتەرىلگەن بولاتىن. «قاراشىعاناق پەتروليۋم وپەرەيتينگ ب. ۆ.» كومپانياسىنان ءبىر ميللياردقا جۋىق قارجى ءبولىنىپ، ەكى جىلعا جۋىق كۇردەلى جوندەۋ جۇمىستارى ءجۇردى. استانا مەرەكەسىنىڭ قارساڭىندا جاستار ستاديونى ورالدىقتاردىڭ يگىلىگىنە بەرىلىپ وتىر. بارشاڭىزدى ەلوردانىڭ 20 جىلدىعىمەن قۇتتىقتايمىن، - دەدى سالتاناتتى شاراعا ارنايى قاتىسقان وبلىس اكىمى التاي كولگىنوۆ.
جيىن بارىسىندا باتىس قازاقستان وبلىسى بويىنشا تۇڭعىش رەت دوپتى حوككەيدەن قازاقستان رەسپۋبليكاسىنا ەڭبەگى سىڭگەن جاتتىقتىرۋشى اتاعى ۆيتاليي نەمولوچنىيعا بەرىلدى. ال جاستار ستاديونىنداعى اشىق مۇز ايدىنىنىڭ قۇرىلىس جۇمىستارىن جۇرگىزگەن «بىرلىك» جشس-نىڭ ديرەكتورى امانجول يسماعۇل ۇلى جاستار ستاديونىنا 10 كونكي مەن 10 دوپتى سىيعا تارتتى.
